Ceyhun Məmmədov-Olmaq ya da ölmək

İnsan bir günəş olmaq istər

Qara buludlara qalib gəlmək üçün.

Sevgi olmaq istəyərsən

Diləyin, yalnızlığı bir göz qırpımında öldürməkdir.

Bəzən gecəyə dönməyi arzulayarsan

Çünki o, gecə yarısında pəncərə qarşısındadır.

Zamanın özü olmağı düşünərsən

Saatları dayandırıb, insanların tələsmədiyini izləyərsən.

Bir dənə yol olarsan

Sırf hamı düzgünlüyü tapsın deyə, amma boş xəyallar.

Silah olmağı arzulamaram

Uşaqların ölmələri, dünyanın boğulmuş hala keçməsidir.

Göyərçin olaram

Qəfəs axtarmaq üçün yox,

Dünyanı sülhə çevirmək olar tək diləyim.

Bir kibrit olmaq istəyərəm

Bütün saxta sənədləri yandırmaq üçün.

Musiqi olmağı düşünürəm

Kənar səsləri eşitməyim deyə.

Sərnişinsiz bir qatar olmağı diləyərəm

Buralardan çox uzağa,

İnsanlar olmayan bir şəhərə gedib-qayıtmamaq üçün.

Mən bir Tanrı da olmaq istərdim

Bəlkə onda daha dərin başa düşərdim onu mən.

Özün olmalısan, başqa insanlar qarışmasın sənə

Toxunmasın sənə şeytanlar, azdırmasın səni dinlər.

Böyük bir səssizlik olmaq istərdim

Tanrının musiqilərindən biri məsələn.

Bu həyatda ya olmaqdır ya da ölmək

Başqa çarən yoxdur,

Nəfəs almaq, halbuki heç zaman dərd deyildi.

Dözülməz olan özümüzük

Ya düşmənik, ya da dost öz-özümüzə qarşı.

Bir çarəsi var indi

Ya olmaq, ya da ölmək.