Ceyhun Məmmədov-Noyabr üçün darıxmaq

 

  +Noyabr, həmin ay üçün darıxmaq hissi keçir daxilimdən. İnsan niyə təqvimdə qeyd olunan bir ay üçün darıxsın ki?! Hərçənd ki, möcüzələrə inanacaq fikrə sahib deyiləm. Səncə Zero, möcüzələrə inananlar huzurlu yaşayırlar?

-Huzurlu olmaq üçün hər bir insan özünə görə müxtəlif vasitələr seçə bilər. Kimisi musiqini, kimlərsə yemək yeməyi, kim isə möcüzələrə inanaraq huzurlu olar.

+Və yaxudda kimlər isə sevdiyi şəxsinə sarılaraq huzurun daxilinə düşər.

-Noyabr ayı üçün daha çox darıxanlar, tənha olanlardır. Təqvimdə həmin ayı qırmızı işarəyə almaq lazımdır. Tənha insanlar üçün həmin ay bir bayram kimi qeyd olunmalıdır.

+Zero, özümüzü çoxmu aldadırıq? Göy üzünə baxarkən düşündüyüm tək bir şey var. Nə zaman bu yer kürəsindən ayrılacam deyə, fikirləşirəm. Səncə yalnız ölərkənmi bu istəyim reallaşacaq?

-Bəzi istəklər ölərək reallaşır. Çox da üzmə qəlbini. O ki, qaldı özümüzü aldatmağa. Bu qətiyyən pis bir xüsusiyyət deyil. Əgər insanlar özünü aldatmasa onda səhərə qalmaz, şəhərin mərkəzi küçələrinə intihar xəbərləri yayılardı.

+Bəs birdən intiharın özü yaxşı bir xüsusiyyət olsa? Hətta özümüzü aldatmaqdan belə gözəl olsa, onda necə?

-Hal-hazırda bunun əksini düşünürük. Gələcəyə doğru qaçma. Düzdür 50% xeyirli olduğunu fikirləşirəm. Amma intihara meyilli deyiləm. Çünki, həmin faiz dərəcəsi bəs etmir. Zamanın axışına buraxmışam özümü. Ona görə də sənə intiharın tam şəkildə yaxşı bir xüsusiyyət olması ilə bağlı fikir söyləyə bilmərəm.

+Zero, noyabr ayı üçün çox darıxıram.

-Darıxdığın təki noyabr ayı olsun, insan olmasın.

+Bəlkə həmin ayda olduğumuzu təsəvvür edək? Mən də biraz təsəlli tapmış olaram.

-Gözlərini yum və sərin bir küləyin saçlarını dağıtdığını hiss etməyə başla, Sofi. Sonra isə buludlar ağlamağa başlayır. Onların göz yaşları üzünə damcılanır. Əynini qalın geyinməyin hər halından bəllidir. Yağışın səsinə qulaq ver. Diqqətlə dinlə. Gör necə özlərini yerə atırlar. Qollarını aç, üzünü səmaya qaldır və var gücünlə bağırmağa başla. Özünü rahatlamış hiss edərsən.

+.............................

-Sofi... Sofi.... Eşidirsən məni?

+…………………….

-Hey, Sofi?! Avqust ayındayıq, xəyalından ayıl.

+Off... İmkan verərdin biraz da xəyal qurardım.

-Amma qollarını doğurdan açmışdın və özüdə üzünü səmaya doğru qaldırmışdın. Günəşin şüaları üzünü yandıracaqdı, biraz da xəyal etsəydin.

+Nə isə. İçimə soyuqluq gəldi bu isti gündə. Deyəsən işə yarayır.

-Əlbəttə işə yarayır. Holoqram bir dünyada yaşayırıq. Xəyal edib inanmağın bioloji olaraq sənə təsir edir.

+Doğrudur, Zero... Doğrudur. Bir tək gedənlərə təsir edib geri qaytara bilmirik.

-Təsir edirik. Sadəcə dərindən inanmaq vacibdir. Ölənlərə bilmirəm, amma nəfəs alaraq gedənlərə səs frekansları ilə təsir etməyimiz mümkündür. Fikirlərimiz ilə özümüzə cəzb edə bilərik. Lakin, bu məsələyə şüphəli yanaşmaq işə yaramayacaqdır.

+.........................