Ceyhun Məmmədov-Danış Zero

  

  +Həyata səslənmək deyə bir şey vardır. Və o, sənə cavab verəcəkdi. Eyni ilə Tanrı kimi. Halbuki cavab verən həmişə özün olursan. İllərcə də bu davam edəcək. Çünki hələ anlamamısınız!

+Zero, səmaya baxanda düşündüyün nə olur?

-Böyük bir səssizlik.

+Çox ciddiyə alırıq hər şeyi. Ancaq bu sıxıntılar yaradır. Ciddiyə alınacaq bir şeylər yoxdur ortada. Vecsizliyin dibində üzə bilmək üçün bağlılığın olmamalıdır heç nəyə və heç kəsə.     

+Zero danış.

-Həyatı ələ salmaq mühüm şərtdir. Ona görə ki, eyni ilə həyat da bizə qarşı bunu edir. Bizə öyrədilənlərin çoxu səhvdir. Universiteddə işləyən bir müəllimin sizdən ağıllı olduğunu heç zaman düşünməyin. Əslində düşüncə tərzi ancaq fərqli olur. Ağıllılıq üstünlüyünü müqayisə etmək deyə bir şey yoxdur. Çünki sadəcə fərqli yönlərdə düşünmək deyə bir şey vardır. Yaş fərqi rol oynamır. Ağıllı və ya ağılsız deyə varlıq mövcud deyil. Burda rol oynayan sadəcə seçdiyin yoldur:

1) Sürü psixologiyasına görə.

2) Fərdi düşüncə qabiliyyətinə görə.

-Sürüdən biri olsan unut sərhədsizliyini. Toplum səni sevəcək, amma sənin beynin çərçivə içində olacaqdır. Sərhədsizliyi dadmaq üçün fərdi yaşamalısan. Çərçivəsiz bir həyat toplumu qıcıqlandıracaq. Ancaq sən bir Tanrı kimi nəfəs alacaqsan. Şeytan da sərhədsizdir, bilirdiniz?! Eyni ilə Allah kimi.

-Səni sıxan hər şeydən uzaqlaşmalısan. İçindən gələn ilk cümləni qeyd et boş vərəqə. Və sonra düşün onu etməyin üçün nə lazımdır? Qarşında kərpiclər varsa, yıx onları. Gələcəyi düşünmə. Çünki günəş pəncərəndən boylanmamış, sabah doğmur. 24 saatlıq bir həyatın var. Sən ancaq bunu düşün. 24 saat ərzində nələr edə bilərsən. Sənin boynuna zəncirlər dolayırlar, xəbərin yoxdur. Elə ən böyük zəncir kəlimələrdən yaranır. Fikir var ki, səni zəncirləyər, fikir də var ki, səni sərhədsiz edər. Kölə olmaq sənin öz seçimindir. Heç kəsi günahlandırma. Başına nə gəldisə, öz fikirlərini doğru istiqamətə yönləndirmədiyindən gəldi. Sizi axmaq yerinə bilirsiniz necə qoyurlar?! Susmuş bir varlığın adından danışarkən.

+Zero, hər şey də günahkar özümüzüksə, ölmək bəs necə?

-Özümüzü zəhərləməyi bacarırıq. Əslində çoxdan zəhərlənmişik. Sadəcə ölümün reallaşmasını gözləyirik. Bu həyat zəhəridir. Zəhərə görə təxminən 21900 gün sonra, ya da həmin rəqəmlərdən tez yuxudan ayılırıq. Bu sadəcə insandan-insana dəyişir.

+Zero, deyəsən elə özümüz hər şeydə günahkarıq.

-Hamı bir nəfər kimi, özü üçün günahkardır. Fərdi bir yaşam, təkcə Tanrıya məxsus deyil! Eh... Bizə səhv öyrədiblər... Bizə səhv öyrədiblər...

+Doğrudur! Yaxşı... Hələlik Zero...